香港人工作繁忙，每日都要同時間競賽，如果要係繁瑣嘅生活中抽時間做運動更係難上加難，其實想有完美體態，只要睡前抽少許時間拉拉筋已經幫助不少，以下五個簡單拉筋動作，大家不妨跟隨練習一下！
第一組：
將雙手放係頭後近後腦位置，手臂貼住耳仔，頭部慢慢向下墮，再輕輕上下搖動脊椎。完成後將身體傾前伸展，再慢慢將脊椎捲回原本坐姿，雙手放開然後深呼吸。
第二組：
先將左膝彎曲，伸出右手，身體向左彎，留意腰部要盡量貼近大腿，停留最少40秒，其間確保拉到腰側，緊記做完一邊動作後需要放鬆大腿，完成後再換另一邊，重覆以上動作。
第三組：
首先將雙腿合上，頭部放鬆慢慢下墜，雙手放於兩側，30秒後將雙手往前伸，身體傾前，完成後捲回原狀。
第四組：
身體平躺然後雙手抱一邊膝，將另一隻腳慢慢向上伸直，用手抓住腳掌或膝蓋），盡量將腳靠近自己上半身，完成後再換另一邊。
第五組：
將身體平躺，雙腿貼牆呈90度角，腳掌可以前後撥動5－10分鐘，呢組床上拉筋，有助改善手腳冰冷問題。
趕快跟住以上五個步驟，齊齊動起來，將冬日脂肪通通踢走！
