現代人成日機不離手，社交平台、通訊軟件係生活必需品，當然唔少得用emoji表情圖案溝通啦。喺對話中加入emoji，表達情感更加到位，令到成個對話更生動抵死！Emoji受到大眾喜愛， 仲受歡迎到有埋專屬節日添！7月17日係｢世界emoji日｣(World Emoji Day)，揀呢一日嘅原因係ios系統嘅日曆emoji日期就係7月17日，所以順理成章將呢一日訂做emoji嘅生日啦。
Emoji源自日本，由手機公司DoCoMo員工栗田穰崇於1999年創造，第一套emoji(绘文字)共有176個，包括天氣標示、路牌、笑臉等等，推出後馬上喺日本網絡同手機用戶間流行起嚟，隨著通訊軟件普及化，emoji好快就步向全世界，其後iPhone同Android手機都相繼採用，emoji正式成為通行世界嘅共同語言。
目前官方認證嘅emoji已經有逾 2,900個，每日send咁多個emoji，你又特別鍾意用邊一個呢？舊年嘅｢世界emoji日｣，Facebook(FB)公佈咗全球十大FB使用最多嘅emoji，結果頭三位分別係｢笑到喊｣、｢心心眼｣同｢飛吻｣。
其中｢笑到喊｣emoji更曾經喺2015年破天荒當選為牛津詞典嘅「年度詞彙」，非常有影響力！
講返｢世界emoji日｣，今年已經係第四年過節啦！為咗慶祝emoji生日，過往世界各地都有唔同慶祝活動。全球最大表情符號資源庫— 表情圖標百科(Emojipedia)每年都會舉行Emoji選舉，畀全球網民選出｢最佳新emoji｣、｢最想要的emoji｣、｢最具代表性的emoji｣等等。蘋果公司亦喺舊年7月17推出一系列新emoji，包括｢暴龍｣、｢爆頭｣、｢星星眼｣等等。
紐約帝國大廈亦喺當日亮起黃燈，而英國皇家歌劇院（Royal Opera House）舊年仲同Twitter合作，舉行咗emoji講故事活動，透過Twitter帳戶用emoji演繹著名歌劇或芭蕾舞劇故事。你又估唔估到以下係邊一個故事呢？
平時用emoji用得多，但就唔知原來｢世界emoji日｣嘅慶祝活動有咁多！唔知今年又會有咩搞作呢？
資料及圖片來源：維基百科、Emojipedia、World Emoji Day網站、Facebook、Twitter、The New Lens、Business Next
