生活冷知識-牙膏5個鮮為人知用途

編輯推介

屋企支牙膏除咗日日用嚟刷牙,仲可以點樣物盡其用呢?今次就同大家分享一下5個牙膏用途冷知識,從此你哋會發現原來牙膏係日常生活中價廉物美嘅好幫手!

  1. 止痕

春夏季節最容易被蚊叮蟲咬,令皮膚紅腫痕癢,如果屋企無上藥膏,可以用牙膏塗喺患處上,牙膏裡面含有甘油丶生薑油等成份,都可以有助消炎及減輕痕癢帶來不適,不過如果俾毒蟲蜜蜂之類昆蟲咬傷,都應該要立即睇醫生啦!

 

  1. 除去鏡面刮痕

刮痕最易出現喺鏡面物品上,例如:手機螢幕丶眼鏡丶手錶丶光碟及鏡子等等,只要塗一層牙膏喺有刮痕嘅地方,等牙膏乾透之後,用濕毛巾將牙膏抹走,牙膏裡面研磨劑就可以將刮痕移除走,甚至不銹鋼上污垢都可以用同樣嘅方法清理。

 

  1. 清潔鞋子污漬

近年流行白波鞋,相信不論男女都為之鍾情,但要保持波鞋「白」的確唔容易,如果有污漬點算好?可以試下用少量牙膏再配合軟毛牙刷,牙膏裡溫和嘅磨擦劑可以輕鬆將污漬擦走,而且不傷鞋子表面。

 

  1. 黏貼海報

如果想喺屋企貼海報,又唔想貼膠紙搞到油漆剝落,咁牙膏就係好幫手啦!只要係海報四個角塗上牙膏,就可以將海報貼上牆,之後只需要加些少水係牙膏部分,就可以輕易撕走海報,牆身都唔會留有痕跡。

【延伸閱讀】壓力大?舒緩壓力五大方法

 

  1. 除臭

喜歡入廚嘅朋友都知道,當處理完一啲有濃烈氣味嘅食材,例如:大蒜丶洋葱丶海鮮等等,手上都會有殘留氣味,即使用洗手液都洗唔走。哩個時候可以用牙膏代替洗手液清洗雙手,可以有效地將指甲及皮膚上殘留氣味徹底清除。

不妨同身邊朋友都分享下牙膏隱藏嘅小秘密,大家日後可以更物盡其用啦!

【延伸閱讀】5個有效的讀書心得

 

資料來源:YouTube