海洋公園41歲啦!

全城熱話 編輯推介

提起香港嘅主題樂園,大家第一時間會諗起海洋公園定迪士尼?相信唔少人都會揀前者,海盜船、越礦飛車、纜車、哈囉喂、海洋劇場、安安佳佳等等……通通都耳熟能詳。呢個港人幾乎一定去過嘅主題公園於1977年1 月10日正式開幕,坐擁構成逾91.5公頃嘅8大園區同80個機動遊戲及設施。作為最多入場人次嘅主題公園之一,海洋公園到底有咩重要事件呢?

  1. 大熊貓定居海洋公園

    1999年,為慶祝香港回歸兩週年,中國向園方贈送兩隻名為「安安、佳佳」嘅大熊貓,寓意香港『安』定繁榮,迭創『佳』績。自此兩隻國寶成為樂園嘅生招牌之一,吸引眾多遊客慕名以來,2007年,再有兩隻幼齡熊貓盈盈同樂樂加入呢個熊貓家族。2016年10月,年屆38歲「熊瑞」之齡嘅佳佳因老弱病痛被「安樂死」,海洋公園舉行悼念儀式,用佢嘅骨灰種植銀杏樹,眾多市民亦喺網上悼念。

  2. 推出「十月全城哈囉喂」

    2001年海洋公園開始舉辦以慶祝萬聖節為主題嘅「十月全城哈囉喂」,樂園由盛智文掌舵之後,活動規模愈嚟愈大,現已成為樂園全年最引頸以待嘅盛事。由主題、廣告同宣傳至代言人等都係城中焦點,某幾年既活動更係獲得史無前例嘅成功,例如2010年邀請咗羅蘭姐出任代言人就大受歡迎。不過哈囉喂舉辦以嚟都惹過唔少爭議,包括被指鼓吹冥婚、「模擬瞓靈床、出殯」嘅鬼屋亦被指「玩大咗」,而近來最轟動嘅一定係舊年21歲青年試玩鬼屋「活埋凶間」時遭木板擊斃,安全性嚴重被質疑。

  3. 內地遊客湧入樂園

    2003年SARS襲港令樂園嚴重虧損,「自由行」嘅實行成功為海洋公園救亡,入場人數按年上升,2013年更創下新紀錄770萬人次。不過亦隨之引發中港矛盾,樂園塞爆大陸遊客,部分人打尖、叫囂、向動物掟垃圾、隨地大小便同吐啖等等。員工同本地遊客飽受折磨,有感樂園已唔屬於香港人,意興闌珊之下令本地客入場人數銳降。海洋公園就不時推出港人優惠補救,舊年就有2.8萬張$40門票供香港人搶購,反應熱烈。

  4. 屢獲獎項

    海洋公園亦有唔少獲獎嘅威水史,最勁嘅要數2012年,樂園勇奪「2012 Applause Award」(全球最佳主題公園),係亞洲首次有主題公園獲得此殊榮。而多年嚟,樂園亦不時喺企業形象、管理、宣傳等方面獲獎,作為香港人,唔多唔少都覺得驕傲!

  5. 奴役動物爭議

    2012年8月,海洋公園將海豚表演場數増至每日六場,遭14個動物關注團體指控係奴役行為,更聯合到園外抗議。其實海洋公園被指「保育為名 掠水為實」並唔係新鮮事,近年被多次揭發有海洋生物「離奇死亡」而無向公眾透露,漠視動物嘅福祉,睇怕海洋公園都好難平息公眾嘅不滿啦。

開幕41年,海洋公園經歷無數起同跌,或者好多人覺得佢已經變質,但畢竟佢都曾經為無數香港人帶嚟美好嘅回憶,希望呢個屬於香港嘅主題樂園會一直屹立不倒,再創佳績。

資料來源:海洋公園官方網站, 維基百科
圖片來源:網絡